17/32. არ მიუახლოვდეთ მრუშობას! უეჭველად,
იგი ზნედაცემულობა და ცუდი გზაა.
განმარტება:
უზენაესმა ალლაჰმა მორწმუნეებს ზინა (მრუშობა)
და მასთან დაკავშირებული ყოველი მიზეზი (საბაბი) აუკრძალა.
„არ მიუახლოვდეთ მრუშობას! უეჭველად, იგი ზნედაცემულობაა“
- ძალიან დიდი ცოდვაა.
„და ცუდი გზაა“ - ის (მრუშობა) ძალიან ცუდი
გზა და ქმედებაა.
იმამ აჰმედი აბუ უმამესგან გადმოგვცემს: ახალგაზრდა
ყმაწვილი შუამავალთან (სალლალლაჰუ ‘ალეიჰი ვა სალლამ) მივიდა და უთხრა: „ჰეი ალლაჰის
შუამავალო! მომეცი ნება, რომ ვიმრუშო.“ იქვე მყოფებმა ყმაწვილს მიუბრუნდნენ, გაკიცხეს
და მსგავსი საუბარი აუკრძალეს. შუამავალმა (სალლალლაჰუ ‘ალეიჰი ვა სალლამ) ყმაწვილს
მიმართა: „მომიახლოვდი.“ ახალგაზრდა შუამავალს მიუახლოვდა, რის შემდეგაც შუამავალმა
დაჯექიო უთხრა და ყმაწვილიც დაჯდა. ამის შემდეგ ალლაჰის შუამავალმა (სალლალლაჰუ ‘ალეიჰი
ვა სალლამ) ყმაწვილს ჰკითხა: „ისურვებდი თუ არა, რომ შენმა საკუთარმა დედამ მსგავსი
რამ (მრუშობა) ჩაიდინოს?“ ყმაწვილმა უპასუხა: „ვისურვებდი, რომ ალლაჰის ნებით შენ გზაზე
სული გავწირო. ვფიცავ ალლაჰს! მსგავსს არ ვისურვებ.“ შუამავალმა (სალლალლაჰუ ‘ალეიჰი
ვა სალლამ) უპასუხა: „სხვა ადამიანებსაც საკუთარი დედისთვის მსგავსი რამ არ სურთ.“
ამის შემდეგ შუამავალმა (სალლალლაჰუ ‘ალეიჰი ვა სალლამ) ჰკითხა: „შენმა საკუთარმა გოგომ
მსგავსი რამ (მრუშობა) რომ ჩაიდინოს გესიამოვნება?“ ყმაწვილმა უპასუხა: „ვისურვებდი,
რომ ალლაჰის ნებით შენ გზაზე სული გავწირო. ვფიცავ ალლაჰს! მსგავსს არ ვისურვებ.“ შუამავალმა
(სალლალლაჰუ ‘ალეიჰი ვა სალლამ) უპასუხა: „მსგავსი რამ სხვა ადამიანებსაც არ სიამოვნებთ.“
შუამავალმა (სალლალლაჰუ ‘ალეიჰი ვა სალლამ) ჰკითხა: „შენმა საკუთარმა დამ მსგავსი ქმედება
რომ ჩაიდინოს მოგეწონება?“ ახალგაზრდამ უპასუხა: „ვისურვებდი, რომ ალლაჰის ნებით შენ
გზაზე სული გავწირო. ვფიცავ ალლაჰს! მსგავსს არ ვისურვებ.“ ამის შემდეგ შუამავალმა
(სალლალლაჰუ ‘ალეიჰი ვა სალლამ) თქვა: „სხვა ადამიანებსაც საკუთარი დისთვის მსგავსი
ქმედება არ მოეწონებათ.“ ალლაჰის შუამავალმა (სალლალლაჰუ ‘ალეიჰი ვა სალლამ) ისევ ჰკითხა:
„შენმა საკუთარმა მამიდამ მსგავსი რამ რომ გააკეთოს მოგეწონება?“ ახალგაზრდამ უპასუხა:
„ვისურვებდი, რომ ალლაჰის ნებით შენ გზაზე სული გავწირო. ვფიცავ ალლაჰს! მსგავსს არ
ვისურვებ.“ რის შემდეგაც შუამავალმა (სალლალლაჰუ ‘ალეიჰი ვა სალლამ) თქვა: „სხვა ადამიანებსაც
საკუთარი მამიდასთვის მსგავსი ქმედება არ ესიამოვნებათ.“ შუამავალმა (სალლალლაჰუ ‘ალეიჰი
ვა სალლამ) ისევ ჰკითხა: „გესიამოვნება შენმა საკუთარმა დეიდამ მსგავსი ქმედება რომ
ჩაიდინოს?“ ყმაწვილმა უპასუხა: „ვისურვებდი, რომ ალლაჰის ნებით შენ გზაზე სული გავწირო.
ვფიცავ ალლაჰს! მსგავსს არ ვისურვებ.“ შუამავალმა (სალლალლაჰუ ‘ალეიჰი ვა სალლამ) უპასუხა:
„სხვა ადამიანებსაც მსგავსი რამ საკუთარი დეიდასთვის არ მოეწონებათ.“ აბუ უმამემ თქვა:
„ამის შემდეგ შუამავალმა (სალლალლაჰუ ‘ალეიჰი ვა სალლამ) ახალგაზრდას ხელი დაადო და
შემდეგნაირი ვედრება გააკეთა: ‘ჩემო ალლაჰო! აპატიე ცოდვა, გაასუფთავე მისი გული და
დაიცავი მისი ღირსება.’“ აბუ უმამემ თქვა, რომ ამ ფაქტის შემდეგ ყმაწვილმა ყველაფერს
მოერიდა, რაც კი, ჰარამი იყო.“[1]